امرأة تتكلم..

لقد كان يوماً رائعاً ..

اعرف جيداً لماذا ..

ليس لأني قابلت صديقة قديمة من الماضي وامضيت معها ساعات

وليس لأنني تحدثت معها عن ايام المدرسة واستعدت ذكريات جميلة ومضحكة

وليس لأنني عدت إلى البيانو ..

وليس لأنني رأيتك وتحدثت معك ..

ولكن فقط .. لأن كل ما حدث ..اعادني الى نفسي

الى الطفلة داخلي ..المرحة ..الضاحكة ..الشقية ..

ورأيت الحياة جميلة ..رائعة

وجدت اشيائي ..وعرفت اصحابي واحبابي

كانوا دائماً هناك ..ولكنهم فقط ضاعوا

ضاعوا ولم يختفوا

ضاعوا وسط الزحام ..زحام الأفكار ..زحام الأحداث ..زحام الحياة

ليس لتجاهلنا لهم .. وليس لأهمالنا ..بالعكس

ولكن لأننا اعتدنا عليهم ..

نراهم كثيراً ونفكر فيهم اكثر ..ونفقدهم اكثر

الا تتفقون معي اننا نفقد المعنى الحقيقي وراء الأشياء ؟؟

ننسى لماذا اخترناها ..كيف ملكناها ..

لماذا نحبها ..

نضع اسباباً غبية ..مادية ..نرضي بها غيرنا قبل انفسنا

وننسى الأسباب البسيطة البريئة

وتصبح مجرد اشياء في حياتنا اليومية

قال لي صديقي وقريبي جاسر ...منذ فترة ..

انه زار بيت احد اقاربنا في الفيوم ..وانه كان مشتاق لهم كثيرا

وانه استمتع بوقته هناك .. وانهم يختلفون عن بقية العائلة .. وانهم يفهمونه رغم انتمائهم لجيل ابائنا

وانهم ..وانهم ..قال كلاما كثيرا

وقد كنت اعرف .. انهم رائعين .. واني احبهم ..كما يحبهم جاسر

وتذكرت .. مرت سنة منذ ان رايتهم اخر مرة.. بل اكثر ..في زفاف ابنة عمي ..واعرف اني لن اراهم الا في المناسبة القادمة ..

واعرف اني لن اقوم بزيارتهم ..إلا من اجل الواجب

عندما يطلب مني ابي ذلك .. ويقول "هنروح النهاردة نزور قرايبنا اللي في الفيوم "

وأعرف إني سأقول لشقيقتي " انا مش عايزة اروح الفيوم .. انت ليكي نفس؟؟ "

لأني اعتدت ..ان زيارة الأقارب ..من اجل الواجب ..وفي ايام محددة ..مناسبات معينة ..

حسب خطة يضعها ابي ..او امي ..بين الحين والاخر ..

شكراً يا جاسر لأنك جعلتني اعرف ..اني احبهم..واني اقتقدهم..

______________________________________

عودة الي اليوم ...

اريد فقط ان اقول

اني عدت الى دروس البيانو .. رغم اني منذ فترة شعرت ان الاوان قد فات ..

ورغم حاجتي ل "كورسات " اخرى لدراستي في الكلية ..

ولكني فقط ..احبه

اريد ان اقول .. اني احب دراستي ..

واعرف انها لن توفر لي المستقبل الباهر .. لن ترضي جميع الآراء

ولكني ..احبها

واريد ان اقول اني اريدك ..اريد ان ابقى معك دائماً

ليس لأنك وسيم ..وليس لأنك تحبني .. وليس لأنك ناجح في عملك ..ورائع في معاملتك لي

ليس لأنك "لقطة" ..كما يقولون عنك ...

ولكني فقط احبك ..

اقول هذا

لأني لا اعلم متى اعود للطفلة داخلي مرة اخرى ..

ولأني لا اعلم متى سأفيق مرة أخرى ..... من زحام الحياة

المتاهة

ساعات كتير بلاقي نفسي تايهة ..

تايهة لدرجة اني مش عارفة اللي مضايقني ..من اللي مفرحني

تايهة حتى جوه نفسي ..

زحمة زحمة ..افكار كتير ..ملامحها مش باينة

حاجات حصلت .. وحاجات ياريت تحصل

كلام كتير ..

كلام بسمعة للمرة المليون جوة دماغي ..

مش راضي يتمسح ..مش راضي يتنسي

اه لو اقدر اطلعة برة راسي .. وارمية في ابعد مكان

بس مافيش فايدة

لسة بيتعاد ..كل شوية

وانا بردة لسة تايهة

ده انا حتى مش عارفة اذا كنت عايزة اضحك ولا اعيط

الوقت بيعدي .. وانا عاملة زي الصخر

مفيش حاجة قادرة تحركني .. وتغير ملامحي

انا عاملة زي ما اكون في متاهة ..

بس متاهة ازاي ؟؟ وانا عارفة الباب فين ..

انا شايفاه .. شايفاه واضح زي الشمس

بس كأني مش عارفة اتحكم في نفسي

انا مش قوية قوي كده ..علشان اقدر اخرج

ورغم اني لسة شايفة الباب .. واضح قوي زي الشمس

وكمان بيناديني .. بيقولي تعالي ..انت لازم تبقي هنا

ده مكانك الصح

بس برده واقفة في مكاني ..عاملة نفسي مش شايفاه

ولسة بقول اني تايهة ..

لسة عاملة إني تايهة ..

بس انا والله تايهة .. انا عارفة ..

زحمة .. لسة الزحمة جوة دماغي

وشوش كتير .. شايفاهم .. اللي بيضحكلي .. واللي بيزقني .. واللي بيشدني .. واللي بيتكلم كلام كتير علشان بس يزودلي الدوشة

واللي ماشي كدة ومش شايفني .. واللي عامل انه مش شايفني .. واللي انا عاملة مش شايفاه .. زي الباب ..اللي لسة واضح .. زي الشمس

ياه ..نفسي اروح المكان اللي بحبه دلوقتي .. اشرب الكابتشينو السخن الجميل ..واغمض عيني ..واسمع محمد منير .. وانسى الدوشة .. وانسى الزحمة

___

لأ .. انا نفسي تمسك ايدي .. وتخبيها جوه ايدك ..

بتبقى صغيرة قوي جواها ..زي الطفل في حضن مامته

نفسي تاخدني من ايدي .. وتوريني الطريق

تقولي اهو الباب .. تعالي وانا هاوديكي

وانا افرح قوي .. وممكن اعيط من الفرحة ..

وامسك ايدك جامد .. علشان ماتوهش تاني

كأني ماكنتش شايفة الباب ده قبل كده .. ده حتى ماكنش باين ..

مش عارفة من غيرك كنت هاشوفه ازاي ..

_____________

جوايا بندهلك .. ياترى بتسمعني ؟؟ وفينك ....