Sunday, February 06, 2005

المتاهة

ساعات كتير بلاقي نفسي تايهة ..

تايهة لدرجة اني مش عارفة اللي مضايقني ..من اللي مفرحني

تايهة حتى جوه نفسي ..

زحمة زحمة ..افكار كتير ..ملامحها مش باينة

حاجات حصلت .. وحاجات ياريت تحصل

كلام كتير ..

كلام بسمعة للمرة المليون جوة دماغي ..

مش راضي يتمسح ..مش راضي يتنسي

اه لو اقدر اطلعة برة راسي .. وارمية في ابعد مكان

بس مافيش فايدة

لسة بيتعاد ..كل شوية

وانا بردة لسة تايهة

ده انا حتى مش عارفة اذا كنت عايزة اضحك ولا اعيط

الوقت بيعدي .. وانا عاملة زي الصخر

مفيش حاجة قادرة تحركني .. وتغير ملامحي

انا عاملة زي ما اكون في متاهة ..

بس متاهة ازاي ؟؟ وانا عارفة الباب فين ..

انا شايفاه .. شايفاه واضح زي الشمس

بس كأني مش عارفة اتحكم في نفسي

انا مش قوية قوي كده ..علشان اقدر اخرج

ورغم اني لسة شايفة الباب .. واضح قوي زي الشمس

وكمان بيناديني .. بيقولي تعالي ..انت لازم تبقي هنا

ده مكانك الصح

بس برده واقفة في مكاني ..عاملة نفسي مش شايفاه

ولسة بقول اني تايهة ..

لسة عاملة إني تايهة ..

بس انا والله تايهة .. انا عارفة ..

زحمة .. لسة الزحمة جوة دماغي

وشوش كتير .. شايفاهم .. اللي بيضحكلي .. واللي بيزقني .. واللي بيشدني .. واللي بيتكلم كلام كتير علشان بس يزودلي الدوشة

واللي ماشي كدة ومش شايفني .. واللي عامل انه مش شايفني .. واللي انا عاملة مش شايفاه .. زي الباب ..اللي لسة واضح .. زي الشمس

ياه ..نفسي اروح المكان اللي بحبه دلوقتي .. اشرب الكابتشينو السخن الجميل ..واغمض عيني ..واسمع محمد منير .. وانسى الدوشة .. وانسى الزحمة

___

لأ .. انا نفسي تمسك ايدي .. وتخبيها جوه ايدك ..

بتبقى صغيرة قوي جواها ..زي الطفل في حضن مامته

نفسي تاخدني من ايدي .. وتوريني الطريق

تقولي اهو الباب .. تعالي وانا هاوديكي

وانا افرح قوي .. وممكن اعيط من الفرحة ..

وامسك ايدك جامد .. علشان ماتوهش تاني

كأني ماكنتش شايفة الباب ده قبل كده .. ده حتى ماكنش باين ..

مش عارفة من غيرك كنت هاشوفه ازاي ..

_____________

جوايا بندهلك .. ياترى بتسمعني ؟؟ وفينك ....


12 Comments:

Blogger Gazzer said...

ya bab ya ma2foul emta el do7'oul
sobort yama welly yosbor yenoul
da2eit seneen el rad yerga3ly meen
law kont 3aref meen ana .. kont a2oul!
3agaby!

10:49 PM  
Blogger rayhane najib said...

سلام
كلام جميل ورقيق
اعتقد انه عندما تنبع الكلمة من القلب لا يمكن الا ان تصل الي القلب
أما الباب البعيد فإن الحكي الجميل عنه هو بمتابة قطع نصف الطريق المؤدية اليه

12:25 AM  
Blogger بتاع البسبوسة said...

لا يوجد شيء أسوأ من الحيرة فهي قاتلة أكثر من أبشع القتلة . فأين المأوى

3:02 PM  
Anonymous مواطن مصرى said...

ليه تسكتى زمن اتكلمى ليه تدفعى وحدك الثمن اتكلمى اتكلمى اتكلمى اتكلمى اتكلمى اتكلمى

11:44 PM  
Blogger المليجي said...

وكأن كلماتك تنطق محرفة لكلمات عبد الرحيم منصور قائلة:
والكون بحاله الآن مايساعش حتة من قلبي

6:33 PM  
Blogger Tara said...

يسرى

حبيت كلماتك هذه جدا جدا جدا جدا

5:00 AM  
Blogger رحال said...

ياه فعلا أنت متاهه بحق و حقيق الواحد بيتوه في كلامك هو ممكن يكون في كده ممكن أسالك سؤال؟

أنت مين؟

6:47 PM  
Blogger mohammed said...

very sestamental words really, but my friend you have to know that everyone of us has his own door and cant reach it everytime, just try and try and try succeed once and failed ten times, but nothing but keep trying....
Mohammed
returnforever@hotmail.com
mmman81@yahoo.com

3:27 PM  
Blogger Nour said...

So touching..So true..

6:42 PM  
Blogger S e M o N o S said...

Btw kalmek same my words that i felt and wrote bs elfar2 eny ktabt after elm2sah ,, i know that feeling so so much

3:56 AM  
Blogger The Philosophical Strangler said...

the way you personalise your writings is so sincere, it's as if you take the reader by the hand show him/her the world through your eyes, it's too simple to be anything but sincere and from the heart.
Love it.

2:29 AM  
Blogger true man said...

يا سلام عالتفاهة
اظن دى للو كانت يسرى مش كنتو هتردو عليهاhttp://dodda18.blogspot.com/

3:41 AM  

Post a Comment

<< Home