بعد يوم طويل وممل، زي أي يوم عادي .. روّحت بيتنا
ودخلت اوضتي مش شايف قدامي
اترميت ع السرير .. وقاعد سرحان باصص للسقف
ومش عارف ايه اللي خلاني فجأة ابص يميني
علشان الاقي على الحيطة واقف عنكبوت .. صغير .. لأ مش صغير قوي
شكله غريب .. فعلاً غريب .. مش زي أي عنكبوت .. بس جميل
ما كنتش عارف أشيل عيني من عليه
مش علشان خايف منه ولا حاجه
بس علشان كان في حاجة فيه شدّاني قوي
المهم .. مديت ايدي جبت الشبشب من تحت السرير .. بحركة تلقائية
رفعت ايدي علشان انزل بالشبشب على العنكبوت افرتكه ..
ده عنكبوت .. انا اتعلمت اني اموته أول ما اشوفه
بس ...
فجأه كده رجعت في كلامي .. ولقيتني بقول لنفسي .. أنا هسيبه ..
ده حتى ما عمليش حاجة وحشة .. وبعدين هو مين قال يعني انه مش كويس
وابتسمت ابتسامة .. مش عارف معناها ايه ..
____
وسبته
وفضل العنكبوت في الأوضة بتاعتي ..
كل يوم ارجع من بره .. أبص عليه .. والاقيه لسة موجود .. أطّمن .. وابتسم
لغاية ما بقت عادة
كل يوم أرّوح .. أبص ع العنكبوت .. وساعات أرّوح بدري .. علشان العنكبوت
وهو في مكانه .. لسة موجود
كل يوم بيكبر حبة .. وياخد مكان من اوضتي اكبر
وكل يوم بيبقى أحلى ... ألوانه بقت أكتر .. بفى شاكله باين قوي
لو أي حد جالي ، أكيد هيشوف العنكبوت بتاعي ..
ومابقاش في بالي غير العنكبوت
__
وزهقت من لعبة العنكبوت دي .. لازم اموته بقى .. دي حتى حاجة تضحك
المشكلة .. اني كل ما اجيب الشبشب علشان انزل بيه ع العنكبوت افرتكه .. أفشل
واسمع اصوات جواية كتير ...
صوت : مش عارف ليه مش قادر
صوت تاني : وانا يعني لو موته دلوقتي .. لما ارجع مش هلاقيه مستنيني زي كل يوم .. ولا هشوفه بيكبر تاني .. ولا هشوف ألوانه بتكتر .. ده أنا حتى متعود انه لازم يبقى موجود
!!صوت تالت : بيضحك ضحكة عالية جداً .. مرعبة .. " ينيلك ..انت مش عارف تموت حتة عنكبوت
!!صوت : ايه ده !! ده بجد !! أنا فعلاً مش قادر ؟!!! ازاي ! ده حتة عنكبوت .. دي كانت مجرد لعبة تافهة
صوت رابع : لأ لأ .. مش عارف اموته ده ايه ! أنا بس وجهة نظري مختلفة عن الناس الباقية .. أنا شايف إني لازم اجرب كل حاجة .. وبعدين ده شكله جميل .. مين قلل انه مش كويس ولازم يموت ؟
يرجع الصوت االأولاني : بس ..بس كلنا عارفين من زمان .. إن العنكبوت ده لازم أول ما نشوفه نموته .. علشان ده مش كويس ..بابا
علطول كان بيقولي كده ... ده عنده شباك ممكن توقع اجدعها ..
الصوت الرابع : شباك ايه بس ..انت هتصدق تخاريف زمان دي ؟؟ احنا دلوقتي في زمن تاني ..كل حاجة اتغيرت ولازم نجرب بنفسنا
..
وبعدين بالعكس ده ممكن يكون مفيد .. ده اكيد مش هيضرني في حاجة .. وعموماً لو ضايقني .. ممكن اموته فى لحظة .. هو اخره ضربة شبشب
وافوق .. الاقيني فوق السرير باصص للسقف ..
_____
وكل يوم نفس الكلام ونفس الحوار .. انا تعبان وزهقت من كتر الكلام والتفكير
انا هقوم أرّوح أحسن ..
وانا في طريقي للبيت النهاردة .. جبت أكل للعنكبوت
ورجعت بسرعة .. دخلت اوضتي
لقيت أمي قالبة الأوضة بتنضفها ..
قلبي وقع في رجلي .. بصيت ع الحيطة .. مش لاقي العنكبوت
أنا مش قادر أفكر .. راح فين .. هعمل ايه دلوقتي
..جريت زي المجنون ادور عليه في كل حته
ولقيته.. بره الأوضه ..كان ممكن يروح مني .. كويس قوي إني لقيته
قمت جبته بسرعة
رجعتة مكانه .. حطيتله الأكل ..
بصيتله ..
رميت نفسي ع السرير .. بصيت للسقف .. وابتسمت ..
_______
في حياة كل واحد فينا عنكبوت .. ويمكن اكتر ..
فكر كدة .. عرفت عنكبوتك مين ؟ عرفت هو ايه ؟؟
**الحدوتة دي فكرة أحمد سعيد
